لکھنؤ ، 21 مارچ (ایس او نیوز؍آئی این ایس انڈیا) سماج وادی پارٹی (ایس پی) کے لیڈر رام گوپال یادو پلوامہ حملے کو لے کر دئے اپنے بیان سے تنازعہ میں گھر گئے ہیں۔بی جے پی نے ایس پی لیڈر سے معافی مانگنے کو کہا ہے۔رام گوپال نے جمعرات کو پلوامہ حملے کو سازش بتایا،کچھ دیر بعد اتر پردیش کے وزیر اعلی یوگی آدتیہ ناتھ نے کرارا جوابی حملہ کرتے ہوئے کہا کہ ان کا یہ بیان ناقص سیاست کی مثال ہے۔سی ایم یوگی نے کہا کہ رام گوپال یادو کو اپنے اس بیان کے لئے سی آر پی ایف جوانوں اور ملک کے عوام سے معافی مانگنی چاہئے۔اس سے پہلے رام گوپال یادو نے پلوامہ حملے پر تبصرہ کرتے ہوئے کہا تھا کہ پیراملٹري کے جوان حکومت سے ناخوش ہیں، ووٹ کے لئے جوان مار دیے گئے۔آپ کو بتا دیں کہ اس حملے میں مرکزی ریزرو پولیس فورس (سی آرپی ایف) کے 40 جوان شہید ہو گئے تھے۔

یوگی آدتیہ ناتھ نے رام گوپال کے بیان پر جواب دیتے ہوئے کہاکہ ہمارے بہادر جوانوں نے ہمیشہ دہشت گردی اور ہر قسم کے انتہا پسندی کا ڈٹ کر مقابلہ کیا اور ملک کی سلامتی کو یقینی بنایا۔جوانوں نے ایئر اسٹرائک سے پی اومیں واقع بالاکوٹ میں سارے دہشت گرد کیمپوں کو تباہ کرکے بہادری کا ثبوت دیا۔اس بہادری پر سوال کھڑا کرنا اور دہشت گردوں کے حق میں ہمدردی آشکاراکرنا شرمناک ہے۔ 

یوپی کی پیشرو سماجوادی پارٹی کی حکومت پر حملہ بولتے ہوئے یوگی نے کہاکہ یہ وہی ایس پی ہے، جس کی حکومت کے وقت 2012 سے 2017 کے درمیان یوپی میں 1000 سے بھی زیادہ فسادات ہوئے اور ہزاروں معصوم مارے گئے۔اس حکومت نے اقتدار میں آتے ہی ریاست کے مختلف دہشت گردانہ واقعات کے مقدمات کو واپس لینے کی بھی کوشش کی تھی، ووٹ بینک کی یہ ناقص سیاست ملک کو کہاں لے کر جائے گی، یہ ایک بڑا سوال ہے۔

سی ایم یوگی نے کہا کہ رام گوپال یادو کا بیان ناقص سیاست کی مثال ہے، انہیں ملک کی عوام اورسی آرپی ایف کے جوانوں سے معافی مانگنی چاہئے۔اس سے پہلے ایس پی جنرل سکریٹری رام گوپال یادو نے کہا تھاکہ پیراملٹري فورسز حکومت سے ناخوش ہیں،ووٹ کے لئے جوان مار دیے گئے،جموں سرینگر کے درمیان چیکنگ نہیں تھی،عام بسوں سے جوانوں کو بھیج دیا گیا،یہ سازش تھی۔ابھی نہیں کہنا چاہتا، جب حکومت بدلے گی تو اس کی جانچ ہوگی اور بڑے بڑے لوگ پھنسیں گے۔